Aũ urriyima : Ahmet Guihini Allatchi
Yarindinii tayinoo, winediĩ ndûgudigi
Aũ tira aya huma aci migizi aruu yutu Kûsu di hayi cii.
Mere kogoyo ye aski ye yurom (hadin) ye hur (fur) ye kîdi ye dîi.
Yum tira, udur hakima de êrši addiĩ jeyi.
Adir tigisuũ, dowiĩ môši tira kiri lompo (migiza ŋa) aciĩ ŋa walayi (wûni nawu) cen.
Kôi têdi, wûnii samgaã da kȗkuta cûu gȗdii cika kogoyo dudu.
Kogoyo caawui askiĩ ŋa kiri.
- Inda : « Kûkuta cûu gûdii cikii, yerdu kînesa » yi.
- Aski hadigi : « Ta înni kisir kînesirigi ? Hû gûde ! » yi.
- Kogoyo hadigi : « Girsu adiĩ bêi, yerdu » yi.
- Aski yîki buzu.
Kogoyo caawui yuroma (hadin) ŋa kiri.
- Inda : « Kûkuta cûu gûdii cikii, yerdu kînesa » yi.
- Yuroma hadigi : « Ta înni kisir kînesirigi ? Hû gûde ! » yi.
- Kogoyo : « Girsu adiĩ bêi, yerdu » yi.
- Yuroma mere di daha cûkki layima de : « Inda mere ŋôluhui ncîdigai cii balik » yi.
Kogoyo caawui huruũ (fur) ŋa kiri.
- Inda : « Kûkuta cûu gûdii cikii, yerdu kînesa” yi.
- Huruũ hadigi de : « Ta înni kisir kînesirigi ? Hû gûde ! » yi.
- Kogoyo : « Girsu adiĩ bêi, yerdu » yi.
- Hurũu hadigi : « Cûdo (hidime) tardoo iña illi ai burdaã ? » yi.
Kogoyo caawui kîdiĩ (kîri) ŋa kiri.
- Inda : « Kûkuta cûu gûdii cikii, yerdu kînesa” yi.
- Kîdiĩ hadigi : « Ta înni kisir kînesirigi ? Hû gûde !” yi.
- kogoyo : « Girsu adiĩ bêi, yerdu » yi.
- Kîdiĩ : « Hei ! Inda iña mêda tammi » yima de ôtu layi buzu.
Noko mara ginna cetuũ, kogoyo dahu huma keleyima de, « Wûni adiĩ di yîdime di boyinoo, ammaa ginna uwugi » yi.
Addi busoo de, kûkutaa lompaã daha tilinduũ de galcindu. Kôi têdi yegeã wûni yerci. Ammaa môšaa carkii kirdu wûni cîtu cii na aciĩ di lalayine.
Te kege tigisuũ aũ tira hadigi « Aũ wûnii wude kogoo aši kogoyo ŋa daha kamumoo sûru » yi.
Kumayindu kogoyã cîtu aši huma kiši aciĩ ŋa daha kapcindu.
Aski aũ naku « Yak ! Aciĩ iŋa huma ha irre » yindu. Aski cawui tedu saga irriĩ owor hartun nasu.
Aũ aya môgirii irriĩ, ammaa aya huma wošiĩ jilla captidaa di yurom (hadin) huma cîdu cen wudu. Ize tira tigisoo de aciĩ dahu sôwu (nasu). Agu kôi têdi hur (fur) huma sadaga di cîdu.
Kîdiĩ mere turonu sura (surca) yutu gapci.
Mêdi kogoyaã jire tigisu : « Wûni adiĩ di yîdime di boyinoo, ammaa ginna uwugi”.