Labara Êska

Posted on

Kûkur Tûbu 2019 | Tafu Dazaga di eke goyima

Aũ urruyima suru huma: Tôgoi Hamid Bôkor

Amma Tura ye Dazagada ye niya ba duro cika tiriši huntu sopere tiriši amma kura-a goyintigi. Ai dawa huma înni? Te ginna ru tiriši nturu înni kege ru fukurigi? Mêra ara cûwa gîskei ru furtirii yikii.

Rai taŋu ru koo, ina amma Tura ye Dazagara ye fûtu ni tiriši amma kura goyintigaa: hayila ye ampa ye zaman ye. Ina ara ginna daa turon turon ŋa ru nûŋurigi.

  • Hayila: amma kara dîraa gura furase ye araga ye yêyintigi. Niya ba duro jillan nu aũ dazaga walla turaŋa  yêyiŋoo mura-i aũ cokuma ni amma ginna ru saga ciire ŋa ru dutigi. Te jillan nu amma gura furase, araga fiyintire ru bara dazaga walla turaŋa yêyintigoo dakinni.
  • Cûu ŋa: «Amma dazaga walla turaŋa ampa danni» yindigi. Mara ru finiŋoo «Dazaga tiriši ampa huma înni?» yindigi. Ilim ye ina munta ginna furase ye araga ye walla inglis ru ruuda jillan nu? 
  • Amma gura na fikir huntu «Mara dazaga ye turaŋa ye ginna zaman huntu tedde» yindigi. Maana huma «dazaga ye tudaga ye ginna yî huntu curuure» yindigi.
  • Rai te ru sagaraa tiriši nturu mere zaka kege fukuruŋa: Karantirigi ni, ruuntirigi ni, radiyo na duro yêentirigi ni, daa doona gontirigi ni. Ai kege ru tiriši nturu fukurigi.

Agu, te ginna ru saga, ini fatiriŋa: amma tiriši nturu niya ba duro sopi cikoo, tîri ši. Tiriši nturu mere na ampa bu dîi. «Înni» nimoo, tiriši mere kimire aũ-u.

Posted on

Doona halagana-a

Doona halagana-a

Êgerdiã wûudii yiĩ gona di ceduũ baideã dooo.

Šakaluũ ndir bûlaa ŋa mere ŋišaa gisi nuũ lôri teduũ dooo.

Dahu ndai danni dahu ndai da jor ceniŋa dooo.

Šakaluũ ndir bûlaa ŋa ham danni famiyaa budi diŋaã dooo.

Mêdi dahu yaunei buruwe bûla-u wôr behere ŋa yiĩ gona di ceduũ baideã dooo.

Kôlugaã hamiĩ yîna yôuuu.

Dêšinii gonĩ di yuĩ de galap nji,

Kêlĩgi lêši dîŋa kêzi gonum janĩ de galap nji.

Iŋaĩ numa êgii jilla kîdi madu ŋadi kiši salayi.

Koso tînemii dede ma inda mîše-u jilla dahu salanuuuum.

Posted on

Concours Toubou 2019

Dates : Les Vendredis et Samedis du 11.1.2019 au 16.2.2019 

Grand cérémonie 16/2/19

Centre al-mouna – toujours 15:45 – 17:30

Vendredi

11/1/19 Cours de grammaire 1

18/1/19 Cours de grammaire 3

25/1/19 Cours de grammaire 5

1/2/19 Petit concours dictée et lecture

8/2/19 Petite cérémonie

Samedi

12/1/19 Cours de grammaire 2

19/1/19 Cours de grammaire 4

26/1/19 Cours de grammaire 6

2/2/19 Préparation et rédaction

9/2/19 Grand Concours

Samedi le 16/2/19 – la grande cérémonie

Rémise de prix

Inscription:

Frais 2.000 cfa (1.000 cfa avec carte d’etudiante) à payer lors du premier cours au Centre al-Mouna

Tudaga: Mahamat Abdel Karim

68 74 64 86 / 93 18 34 74

Dazaga: Ahmat Guihini

62 05 49 76 / 99.38.12.01

Posted on

Kara ka Tûbu bedeyi

Ize Laara, 16/01/2019

Ize oljuã, 11/01/2019, kara ka Tûbu bedeyi. Yaga cûu cikii : yege dazaga-u ye yege tedaga-u ye. Gaagu duro cûu di kara cii : oljuã adir ye sûudũ adir ye.

Unnu amma budi mundu irdu ni urrudindu karayindi cikii. Têu jiŋalu, bini tinda budi lêrda. Ammaa gini ai kege di dakide gor hanadirdi, dahu di na tîdirdi. Ciidi, unnu kogo dahu mukir.

Amma irdu êlifa Tûbu hikindoo, yunu owor (kiši) hundũ duro didũ ginna keege di urruyintigide tigisig. Yo têdi kudiĩ, aũ ka numaa (nuã) urrunigo ngimire : êriša numa ye daga numa ye adaga numa ye doona halagana ye ginna haŋum kôi daha dûdĩgi. Te na yunu budi gali.

Ka amma di urrunigo, adaga (SAKHAFA) amma kuda ŋa dina yeniĩ yo aŋal numa na ize nana ginna hidima cûu jeyinig : ka numaa (nuã) di ŋîzĩgi, ka ammaa di tarjamum (traduit)  urrunĩgi. Kîzii te di yetirgo dakuro, yunu ai šimbir tîda ! Aŋal daha naka ! yunu ai jilla ši daase ! kûro lûlu kenda ! Aũ dogu ciŋa ye êdinge ye ginna baze ! yunu ai huski dûzaa ndra sopu yendide. Tinda na iŋaa tindaa kee tunda ! Te hunoo kîziŋgir kaga digisig : kôi girdũ ginna horosdindu amma kudaa digisig. Yunu te di yeta !

Alla turkuyende !