Author: Rôzi Cûkai Mulati

Posted on

Gagalti Dazaga : Rôzi Usman Issa

Dazaga mire tirši amma kuba-u.

Anuu ru yêyintii ciki hinnoo ini tra lau ru gortu gutirde ši.

Amma Cari duro Dazaga hariyintiga buru muntu ruyintu karayintig ciiru amma kura gûro ruyintu karayintinni.

Tirši huntu na ruu huma hariyintinni cirru amma ŋa goyintig, lakin unnu koo Cari duro Dazaga hananimmoo wuru.

Te mire înni jilla nu? Amma Dazaga hariyintiga muntu, lakin mire jũlu huma ginna Cari ciri yala ŋa.

Amma Dazaga burantiga dîllu cuššintu dau rayintu, dîliga rayintu goyintig hinnoo ini dêri fûge ru hakintinni.

Dazaga mire cîi ru farii ncoo na cussu doonu gonii ncoo na cussu.

Tirša kura Cari duro cika ru koo mire unnu dau wîlli dîi. «Te mire inni?» niŋoo, daŋoo ruun karaniŋ daŋoo na dau ru fîniŋ.

Tuzzu


Posted on

Sagasun ai 2019 ŋa, UNESCO mere ka addi addia dînaã duro cika ginna dina cenigide barayinii cii.

Teu jini, ka addia (ka amma nukundiga mundaa ši na) ammaa gagalcindige barayindigi. Mara, mêda gagala ginna capcindoode, libir gisidigi.

Tara amma Yege Dazaga ŋaa, libir hunduũ duro mêdi gagala Dazaga-u duro tîndirige barandirii yikii. Teu jini waha ndiri ai «Dazaga gagalta»  jendirii yikii.

Aũ bazuũ bazunnaa di labar cene ! Ka ndira gagalta! Mêda gagala-a urrunda !

Mêdi gagala-u urrunigide baraniigoo, yina gura yanum tamoo gali:

1) Gagala mara mêda durusa 50 di kanjindinni.

2) Mêdi numa mere ka ndira (Dazaga) bes gagalcinigi.

Gagala ginna cambiroo, tara libir gagala-u jendirigi. Owini, gagala duro ginna di budi galiĩ UNESCO di kurukur yendirigi.

Dazaga gagalta!